ભારતીય મૂળની અવકાશયાત્રી સુનિતા વિલિયમ્સે ઈન્ટરનેશનલ સ્પેસ સ્ટેશનથી દિવાળી પર્વની શુભેચ્છા પાઠવી છે. અવકાશમાં છેલ્લા કેટલાક મહિનાઓથી ફસાયેલ સુનિતા વિલિયમ્સે વીડિયોના મારફતે દિવાળી શુભેચ્છા સંદેશ પાઠવ્યો છે. જેમાં તેમણે જણાવ્યું છે કે, ISS તરફથી દિવાળીની શુભકામના. હું વ્હાઇટ હાઉસ અને સમગ્ર વિશ્વમાં આજે ઉજવી રહેલા દરેકને દિવાળીની ખૂબ ખૂબ શુભેચ્છાઓ પાઠવું છું. આ વર્ષે મારી પાસે પૃથ્વીથી 260 માઈલ ઉપરથી દિવાળી ઉજવવાની અનોખી તક છે. મારા પિતાએ અમને દિવાળી અને અન્ય ભારતીય તહેવારો વિશે શીખવીને અમારા સાંસ્કૃતિક મૂળ જાળવી રાખ્યા. દિવાળી એ ખુશીનો સમય છે, કારણકે સંસારમાં ભલાઈ પ્રવર્તે છે. વિલિયમ્સે દિવાળીના તહેવારોમાં ભાગ લેવા અને સમુદાયના યોગદાનને માન્યતા આપવા બદલ યુએસ પ્રમુખ જો બાઈડન અને ઉપરાષ્ટ્રપતિ કમલા હેરિસનો પણ આભાર વ્યક્ત કર્યો હતો.
