હાલમાં જ કચ્છના ભૂજ ખાતે 43મી ગુજરાત સ્ટેટ માસ્ટર્સ એથલેટિક ચેમ્પિયનશિપ 2024નું આયોજન કરવામાં આવ્યું હતું. જેમાં મૂળ ખેડા જિલ્લાના કપડવંજની વતની અને હાલ અમદાવાદમાં રહેતી સૌમ્યા પાર્થ ઠક્કરે શાનદાર દેખાવ કરીને પોતાનાં નામે ત્રણ મેડલ કર્યા હતા.
જેમાં સૌમ્યાએ સ્ટેટ લેવલની 200 મીટર દોડ સ્પર્ધામાં પ્રથમ નંબર પર રહી ગોલ્ડ મેડલ જીત્યો હતો. જયારે લોંગ જમ્પમાં સિલ્વર મેડલ અને 100 મીટરની દોડમાં બ્રોન્ઝ મેડલ હાંસલ કર્યો હતો. 43મી ગુજરાત સ્ટેટ માસ્ટર્સ એથલેટિક ચેમ્પિયનશિપ 2024 માં 30 વર્ષના યુવાઓથી લઈને 100 વર્ષ સુધીના સિનિયર સીટીઝનોએ ભાગ લીધો હતો. મહત્વનું છે કે. સ્પર્ધાઓમાં 3 મેડલ જીતનાર થ્રી ડી પેઇન્ટિંગ આર્ટિસ્ટ સૌમ્યા આ પહેલા સ્ટેટ લેવલની સ્વિમિંગ સ્પર્ધામાં પણ મેડલ જીતી ચૂકી છે. આ ઉપરાંત કલા અને રમત ગમત ક્ષેત્રે નાનપણથી જ સૌમ્યા ખુબ જ રુચિ ધરાવે છે અને પોતાનાં નામે 70 જેટલા મેડલ અને સન્માનપત્રો મેળવી ચૂકી છે.
