ઈન્ડિયન પ્રીમિયર લીગ એટલે કે IPL 2025 માટે સઉદી અરબમાં મેગા ઑક્સન ચાલી રહ્યું છે. જેમાં દર વખતની જેમ આ વર્ષે પણ ખેલાડીઓ પર ધનવર્ષા થઈ રહી છે. દરેક ફ્રેન્ચાઈઝી સારા ખેલાડીને પોતાની ટીમમાં લેવા માંગે છે, ત્યારે IPL ઈતિહાસના તમામ જૂના રેકોર્ડને ધ્વસ્ત કરી દીધા છે. લખનઉ સુપર જાયન્ટ્સની ફ્રેન્ચાઈઝીએ ઋષભ પંતને 27 કરોડ રૂપિયામાં ખરીદીને પોતાની ટીમમાં સામેલ કર્યો છે.
આ સાથે જ પંત IPLના ઈતિહાસનો સૌથી મોંઘો ખેલાડી બની ગયો છે. પંતને લખનઉની ટીમે રૂપિયા ૨૭ કરોડમાં ખરીદ્યો તે પહેલા જ પંજાબ કિંગ્સે ગત સિઝનમાં કોલકાતાને ચેમ્પિયન બનાવનારા શ્રેયર ઐયરને રૂપિયા ૨૬.૭૫ કરોડની બોલી લગાવીને ખરીદ્યો હતો. આ સાથે આઇપીએલના સૌથી મોંઘા ખેલાડી તરીકેનો સ્ટાર્કનો રૂપિયા ૨૪.૭૫ કરોડનો રેકોર્ડ તુટી ગયો હતો. આ ઉપરાંત આજના અન્ય 3 મોંઘા ખેલાડીઓ જોઈએ તો, વેંકટેશ અય્યર જેને કોલકાતા નાઈટ રાઈડર્સે 23.75 કરોડ રૂપિયામાં ખરીદ્યો છે. યુઝવેન્દ્ર ચહલ જેને પંજાબ કિંગ્સની ફ્રેન્ચાઈઝીએ 18 કરોડ રૂપિયામાં પોતાની ટીમમાં લીધો છે. આ સાથે જ ચહલ સૌથી મોંઘો ભારતીય સ્પિન બોલર પણ બની ગયો છે. આ સિવાય ફાસ્ટ બોલર અર્શદીપને પંજાબ કિંગ્સની ટીમે RTMનો ઉપયોગ કરીને 18 કરોડ રૂપિયામાં પોતાની ટીમમાં યથાવત રાખ્યો છે.
