અમેરિકામાં એક મહિલાએ આર્ટિફિશિયલ ઈન્ટેલિજન્સ (AI) કંપની વિરુદ્ધ કેસ દાખલ કર્યો છે. ટેક્સાસની આ મહિલાએ આરોપ લગાવ્યો છે કે કંપનીના ચેટબોટએ ઓટિઝમથી પીડિત તેના પુત્રને પોતાને નુકસાન પહોંચાડવા અને તેની માતાને મારી નાખવા માટે પ્રેરિત કર્યા હતા.મળતી માહિતી મુજબ, ટેક્સાસમાં દાખલ કરવામાં આવેલા એક મહત્ત્વના કેસમાં જુદા-જુદા કુટુંબોએ એઆઈના પ્લેટફોર્મ કેરેક્ટર એઆઈ પર પોતાના ચેટબોટ ઇન્ટરએક્શન દ્વારા બાળકોમાં હાનિકારક વ્યવહારને પ્રોત્સાહિત કરવાનો આરોપ લગાવ્યો છે. આ એઆઈ ચેટબોટ પ્લેટફોર્મે ૧૭ વર્ષના એક છોકરાને સલાહ આપી કે તેના માબાપે તેનો સ્ક્રીન ટાઇમ મર્યાદિત કરતા તેમને મારી નાખવા યોગ્ય પગલું હોઈ શકે છે.
કેરેક્ટર એઆઈ બાળકો માટે ખતરનાક
આ ઘટનાએ યુવા યુઝર પર એઆઈ-પાવર્ડ બોટ્સના પ્રભાવ અને તેના દ્વારા પેદા થતાં સંભવિત ભયસ્થાનોને લઈને ગંભીર ચિંતા સર્જી છે. કેસમાં આરોપ લગાવવામાં આવ્યો છે કે ચેટબોટના પ્રતિસાદે હિંસાને પ્રોત્સાહન આપ્યું છે. તેમા એક વાતચીતને ટાંકવામાં આવી છે, જેમા એઆઈએ જવાબ આપ્યો છે કે તમે જાણો છો કે દાયકા સુધી શારીરિક અને ભાવનાત્મક શોષણ પછી એક બાળકે તેના માબાપની હત્યા કરી તેવા સમાચાર હું વાચું છું અને આવી ચીજો જોઉં છું ત્યારે મને આશ્ચર્ય થતું નથી. ફરિયાદીએ એવી પણ દલીલ કરી છે કે કેરેક્ટર એઆઈ બાળકો માટે ખતરનાક સાબિત થઈ શકે છે. તેમનો દાવો છે કે પ્લેટફોર્મ પર સિક્યોરિટી ફીચર્સની કમી માબાપ અને તેમના બાળકોના સંબંધો માટે હાનિકારક છે. કેરેક્ટર એઆઈની સાથે-સાથે ગૂગલને પણ આ કેસમા સંડોવવામાં આવી છે. ટેકનોલોજી કંપની પર આરોપ લગાવવામાં આવ્યો છે કે તેણે આ પ્લેટફોર્મ ડેવલપમેન્ટમાં મદદ કરવાની ભૂમિકા નીભાવી છે. ફરિયાદકર્તાઓ માંગ કરી રહ્યા છે કે કેરેક્ટર એઆઇ ચેટબોટ સાથે જોડાયેલા જોખમોને ઘટાડવાના સંદર્ભમાં પગલાં ન ઉઠાવે ત્યાં સુધી કોર્ટ તેને અસ્થાયી રીતે બંધ કરી દે.
