આજે વર્ષ 2024નો છેલ્લો દિવસ છે, એટલે કે 31 ડિસેમ્બર છે અને આજે રાત્રિના 12 વાગ્યા બાદ શરૂ થનાર 2025ના નવા વર્ષની ઉજવણી કરવા માટે લોકો થનગની રહ્યા છે. ત્યારે 31st ડિસેમ્બરની ઉજવણી પર કોઈ અનિચ્છનીય બનાવ ન બને તે માટે અમદાવાદ પોલીસ એક્શન મોડમાં આવી છે. તેમજ શહેર પોલીસ દ્વારા મહત્વની જગ્યાઓ પર પોઈન્ટ પણ બનાવવામાં આવ્યા છે. શહેર પોલસ દ્વારા પ્રોહિબિશન ડ્રાઈવનું આયોજન કરવામાં આવ્યું છે.
ત્યારે 31stની ઉજવણીને લઈ અમદાવાદના વિવિધ વિસ્તારોમાં પોલીસ દ્વારા ચેકિંગ હાથ ધરવામાં આવ્યું હતું. જે અંતર્ગત અમદાવાદના સાબરમતી વિસ્તારમાં પણ સાબરમતી પોલીસ દ્વારા પાવર હાઉસ ખાતે ચેકિંગ હાથ ધરવામાં આવ્યું હતું. જે દરમિયાન એક કારમાંથી દારૂની બોટલો મળી આવી હતી. જેની સામે પોલીસે પ્રોહિબિશનનો ગુનો નોંધી કાયદેસરની કાર્યવાહી હાથ ધરી હતી.
જ્યારે આ ઉપરાંત ટ્રાફિકના નિયમો તોડનાર વાહન ચાલકોને પણ મેમો આપી દંડ ફટકારવામાં આવ્યો હતો. આ દરમિયાન અમદાવાદ શહેરના જોઈન્ટ પોલીસ કમિશનર નિરજ બડગુજર ખાસ હાજર રહ્યા હતા. આ ઉપરાંત અન્ય પોલીસ અધિકારીઓ તેમજ સાબરમતી પોલીસ સ્ટેશનના પીઆઈ એચ.એન. પટેલ અને સાબરમતી પોલીસ સ્ટાફ આ ડ્રાઈવમાં જોડાયો હતો.
