પ્રજાસત્તાક દિવસને આડે હવે માત્ર ગણતરીના દિવસો રહ્યા છે, પ્રજાસત્તાક દિવસ નિમિતે દિલ્હીના કર્તવ્ય પથ પર શાનદાર પરેડનું આયોજન કરવામાં આવ્યું છે, જેની તૈયારીઓને અંતિમ રૂપ આપવામાં આવી રહ્યું છે. પ્રજાસત્તાક દિવસની પરેડમાં ટેક્ટિકલ બેલિસ્ટિક મિસાઇલ ‘પ્રલય’ અને એન્ટી-ટેન્ક ગાઇડેડ મિસાઇલ ‘નાગ’ બંને જોવા મળશે. આ બંને મિસાઈલ સ્વદેશી છે. પ્રલય પહેલીવાર પ્રજાસત્તાક દિવસની પરેડમાં જોવા મળશે. ‘પ્રલય’ મિસાઇલ એક ટૂંકા અંતરની બેલિસ્ટિક મિસાઇલ છે અને તેની ખરીદીને સંરક્ષણ મંત્રાલય દ્વારા પહેલાથી જ મંજૂરી આપવામાં આવી છે.
‘પ્રલય’ ડીઆરડીઓ દ્વારા વિકસાવવામાં આવ્યું છે. આના ઘણા સફળ પરીક્ષણો પણ કરવામાં આવ્યા છે. ‘પ્રલય’ની રેન્જ 150થી 500 કિલોમીટર છે. તેનો ઉપયોગ જમીનથી જમીન પર હુમલા માટે થઈ શકે છે. તેની પેલોડ ક્ષમતા 500થી 1000 કિલો વિસ્ફોટકો વહન કરવાની છે. પ્રજાસત્તાક દિવસની પરેડમાં કર્તવ્ય પથ પર સ્વદેશી એન્ટિ-ટેન્ક ગાઇડેડ મિસાઇલ ‘નાગ’ પણ જોવા મળશે. ‘નાગ’ને તેના ડેવલપમેન્ટ ફેસ દરમિયાન DRDO દ્વારા પ્રદર્શિત કરવામાં આવ્યું હતું.
