ઈન્ટરનેશનલ સ્પેસ સ્ટેશન પર સુનિતા સાથે એમના સાથી અંતરિક્ષયાત્રી બૂચ વિલ્મોર પણ ફસાયેલા છે. એક મહિનામાં પૂરું થનારું તેમનું મિશન આજકાલ કરતાં સાત મહિના લંબાઈ ગયું છે. ત્યારે ઈન્ટરનેશનલ સ્પેસ સ્ટેશન (ISS) પર સાત મહિના વિતાવનાર સુનિતા વિલિયમ્સને હવે ચાલવા માટે પણ સંઘર્ષ કરવો પડી રહ્યો છે.
તાજેતરમાં, તેમણે વિદ્યાર્થીઓ સાથેની વાતચીતમાં કહ્યું હતું કે, ‘ચાલવાની અનુભૂતિ કેવી હોય છે, એ પણ હું હવે ભૂલી ગઈ છું.’ ગુરુત્વાકર્ષણના અભાવે અંતરિક્ષયાત્રીઓ પૃથ્વી પર જે રીતે ગતિમાન રહેતા હોય છે એ રીતે અંતરિક્ષમાં રહી શકતા નથી. જેને લીધે શરીરના વિવિધ સ્નાયુઓ નબળા પડી જાય છે અને હાડકાં પણ પોલા થઈ જાય છે. સ્પેસ સ્ટેશન પર અંતરિક્ષયાત્રીઓ કસરત કરતા હોવા છતાં તેમના શરીરે પૂરતું બળ લગાવવું ન પડતું હોવાથી લાંબા ગાળે શરીરને નુકસાન થતું હોય છે.
