ભારતીય બાયોલોજિસ્ટ અને વન્યજીવ સંરક્ષક પૂર્ણિમા દેવી બર્મનને ટાઈમ મેગેઝિનના વિમેન ઓફ ધ યર-૨૦૨૫ની યાદીમાં સ્થાન આપવામાં આવ્યું છે. આ લિસ્ટમાં અસાધારણ મહિલા નેતાઓની કામગીરીને બિરદાવવામાં આવી છે. પૂર્ણિમા દેવી બર્મન વર્ષોથી આસામમાં વાઇલ્ડ લાઇફ બાયોલોજિસ્ટ તરીકે સારસને બચાવવાનું કામ કરી રહ્યા છે. તેઓ જ્યારે પાંચ વર્ષના હતા ત્યારથી જ તેમના આ પક્ષીપ્રેમની શરૂઆત થઇ ગઇ હતી. પૂર્ણિમા દેવી બર્મન બ્રહ્મપુત્ર નદીના કિનારે પોતાના દાદા-દાદી સાથે નિયમિત રીતે ફરવા જતા હતા. તેમના દાદા ખેડૂત હતા અને તેમણે જ પૂર્ણિમા દેવીને આ ક્ષેત્રમાં કામ કરવાની પ્રેરણા આપી હતી.
કોણ છે પૂર્ણિમા દેવી બર્મન?
પૂર્ણિમા દેવી બર્મને ઝુઓલોજીમાં ઇકોલોજી અને વાઇલ્ડ લાઇફ બાયોલોજી જેવા સ્પેશિય વિષયોમાં માસ્ટર ડિગ્રી મેળવ્યા પછી પીએચડીનો અભ્યાસ કર્યો છે. હાલમાં તેમણે સારસ પ્રજાતિના પક્ષીઓને બચાવવાના કાર્ય પ્રત્યે જાતને સમર્પિત કરી દીધી છે. હકીકતમાં સારસ પક્ષીઓની સંખ્યા ધીમે ધીમે ઘણી ઓછી થઇ રહી છે જે પર્યાવરણશાસ્ત્રીઓ માટે ભારે ચિંતાનો વિષય છે. આ કારણોસર તેમણે સારસ પ્રજાતિની સંખ્યામાં વૃદ્ધિ કરવાનું બીડું ઝડપ્યું છે.
ટાઈમ મેગેઝિનની વિમેન ઓફ ધ યર ૨૦૨૫ની લિસ્ટમાં સ્થાન પામનાર ૪૫ વર્ષીય પૂર્ણિમા દેવી બર્મન એકમાત્ર ભારતીય મહિલા છે. આ જાહેરાત દરમિયાન બર્મનની ૨૦૦૭ની કામગીરીને ખાસ યાદ કરવામાં આવી હતી. જ્યારે, અસમમાં દુર્લભ પક્ષી- ગ્રેટર એડજુટન્ટ સ્ટોર્ક્સ (ઢોંક) નો માળો ધરાવતા વૃક્ષને કાપવામાં આવી રહ્યું હતું. ત્યારે, તેમણે અનેક વિરોધ વચ્ચે પણ તેને બચાવવાના પ્રયત્નો કર્યા હતા. બર્મનના પ્રયાસોમાં તેમની લગભગ ૨૦,૦૦૦ મહિલાઓની ‘હર્ગિલા આર્મી’ મદદરૂપ બની છે. જેઓ પક્ષીઓના માળાનું રક્ષણ કરે છે. આ નેટવર્ક આસામથી ભારતના અન્ય ભાગોમાં અને હવે કંબોડિયા સુધી વિસ્તર્યું છે.
