ઇન્ડિયન પ્રીમિયર લીગ (IPL) 2025ની શરૂઆત થવામાં હવે ગણતરીના દિવસો જ બાકી છે, ત્યારે ટૂર્નામેન્ટની 18મી સીઝન શરૂ થવાના માત્ર પાંચ દિવસ પહેલાં ભૂતપૂર્વ ચેમ્પિયન ગુજરાત ટાઇટન્સ વેચાઈ ગઈ છે.
આરોગ્ય સંભાળ અને ઉર્જા ક્ષેત્રમાં કાર્યરત જૂથ, ટોરેન્ટ ગ્રુપે ભારતીય ક્રિકેટ બોર્ડ (“BCCI”) સહિત તમામ જરૂરી મંજૂરીઓ પ્રાપ્ત કર્યા બાદ, ઇરેલિયા કંપની પ્રાઇવેટ લિમિટેડ (“આઇરેલિયા”) પાસેથી ઇન્ડિયન પ્રીમિયર લીગ (IPL) ફ્રેન્ચાઇઝ ગુજરાત ટાઇટન્સ (આઇરેલિયા સ્પોર્ટ્સ ઇન્ડિયા પ્રાઇવેટ લિમિટેડ)માં 67% બહુમતી હિસ્સો સફળતાપૂર્વક મેળવી લીધો છે.
આ ડીલની રકમનો સત્તાવાર ખુલાસો કરવામાં આવ્યો નથી. જો કે, મનીકંટ્રોલના એક રિપોર્ટ અનુસાર ગુજરાત ટાઇટન્સનું વર્તમાન મૂલ્ય આશરે રૂ. 7500 કરોડ હોવાનો અંદાજ છે. આ સ્થિતિમાં ટોરેન્ટ ગ્રુપે લગભગ રૂ. 5025 કરોડ ચૂકવીને આ હિસ્સો ખરીદ્યો હોઈ શકે છે. CVC કેપિટલ હજુ પણ ફર્મમાં 33 ટકા હિસ્સો ધરાવશે.
