અમેરિકન પ્રમુખ ટ્રમ્પના આદેશના પગલે અમેરિકન સૈન્યે યમનમાં શ્રેણીબદ્ધ હુમલાઓ શરૂ કરી દીધા છે. ડોનાલ્ડ ટ્રમ્પે સૈન્યને ઈરાન સમર્થિત હુથીઓ દુનિયા માટે મહત્વપૂર્ણ દરિયાઈ કોરિડોરમાં માલવાહક જહાજો પર હુમલા બંધ ના કરે ત્યાં સુધી હુમલા ચાલુ રાખવા જણાવ્યું છે.અમેરિકાની એરસ્ટ્રાઇકમાં અત્યાર સુધી 50થી વધુ હુથી માર્યા ગયા હોવાના અહેવાલ સામે આવ્યા છે, જેના પગલે ઇરાનની ચિંતા પણ વધી છે.
ન્યુયોર્ક ટાઇમ્સના જણાવ્યા મુજબ, યુએસ સેન્ટ્રલ કમાન્ડે હુથીઓના ડ્રોન્સ, રેડાર્સ, મિસાઇલ્સ અને આર્ટિબરી સિસ્ટીમ્સને નિશાન બનાવી તેને ખતમ કર્યાં છે.ઉલ્લેખનીય તો તે છે કે ટ્રમ્પનું આ પગલું તેના પુરોગામી જો બાયડેનની નીતિથી તદ્દન વિરોધાભાસી નીતિને અનુસરી લેવામાં આવ્યું છે. આ સાથે ટ્રમ્પ વહીવટી તંત્રે હુથીને નિશાન બનાવી, ઇરાનને આડકતરી રીતે તેને સંદેશો પાઠવી દીધો છે કે, જો હુથી સહિત અન્ય આતંકી જૂથોને સહાય આપવાનું બંધ નહીં કરો તો, તમારી પણ આવી જ હાલત થશે. ઈરાનની નેતાગીરી એ સમજી ગઈ છે તે કહેવાની જરૂર જ નથી. તેથી તો, તે ભારે ચિંતામાં ગરકાવ થઈ ગઈ છે. તેને આ રીતે તેનો પરમાણુ કાર્યક્રમ અટકાવવા કહી દેવાયું છે.
