ઈન્ડિયન પ્રીમિયર લીગ (IPL)ની 18મી સીઝનની છઠ્ઠી મેચ ગુવાહાટીના બરસાપારા ક્રિકેટ સ્ટેડિયમમાં બુધવારે, કોલકાતા નાઈટ રાઈડર્સ અને રાજસ્થાન રોયલ્સ વચ્ચે મેચ રમાઈ હતી. જેમાં કોલકાતાએ રાજસ્થાન રોયલ્સને 8 વિકેટથી હરાવીને સીઝનની પોતાની પહેલી જીત નોંધાવી હતી.
જ્યારે રાજસ્થાન રોયલ્સે આઈપીએલની 2025ની 18મી સીઝનમાં સતત બીજી મેચમાં હારનો સામનો કરવો પડ્યો હતો. કોલકાતાની જબરદસ્ત બોલિંગ સામે રાજસ્થાનની ટીમ 20 ઓવરમાં 9 વિકેટના નુકસાને માત્ર 151 રન જ બનાવી શકી હતી. જેના જવાબમાં કોલકાતાની ટીમે 17.3 ઓવરમાં 2 વિકેટના નુકસાન પર 153 રન બનાવી લીધા.
રાજસ્થાન માટે ધ્રુવ જુરેલે સૌથી વધુ 33 રન બનાવ્યા હતા. યશસ્વી જાયસવાલ 29 અને રિયાન પરાગ 25 રન બનાવીને આઉટ થયા હતા. કોલકાતા માટે વરૂણ ચક્રવર્તી, મોઈન અલી, હર્ષિત રાણા અને વૈભવ અરોરાએ બે-બે વિકેટ ઝડપી હતી. જ્યારે કોલકાતા તરફથી બેટિંગમાં ડિકોકે અણનમ 97 રનની તોફાની ઈનિંગ રમી હતી.
