લગભગ બે દાયકાની રાહ જોયા પછી, એક અમેરિકન કંપનીને ભારત-અમેરિકા નાગરિક પરમાણુ કરાર હેઠળ ભારતમાં પરમાણુ રિએક્ટર ડિઝાઇન અને નિર્માણ માટે ઐતિહાસિક મંજૂરી મળી છે. કેન્દ્રીય બજેટ 2025માં ભારત સરકારે વર્ષ 2047 સુધીમાં 100 ગીગાવોટ પરમાણુ ઊર્જા ક્ષમતાનું લક્ષ્યાંક નિર્ધારિત કર્યું છે. જેના ભાગરૂપે હવે ભારત-અમેરિકાએ નાગરિક પરમાણુ કરાર (India US Nuclear Deal) પર હસ્તાક્ષર કર્યાના બે દાયકા પછી એક અમેરિકન કંપનીને ભારતમાં પરમાણુ રિએક્ટર બનાવવા અને ડિઝાઇન કરવાની મંજૂરી આપવામાં આવી છે. તેને યુએસ ડિપાર્ટમેન્ટ ઓફ એનર્જી (DoE)તરફથી મંજૂરી મળી ગઈ છે.
ઉર્જા વિભાગે હોલ્ટેક ઇન્ટરનેશનલને ભારતમાં પરમાણુ રિએક્ટર ડિઝાઇન અને નિર્માણ માટે મંજૂરી આપી છે. જેમાં ઉર્જા વિભાગે 26 માર્ચના રોજ કેટલીક શરતો સાથે હોલ્ટેક ઇન્ટરનેશનલના પ્રોજેક્ટને મંજૂરી આપી છે. ભારતમાં ત્રણ કંપનીઓને અવર્ગીકૃત નાના મોડ્યુલર રિએક્ટર (SMR) ટેકનોલોજી ટ્રાન્સફર કરવાની મંજૂરી આપી છે.
આ સાથે તેની પ્રાદેશિક પેટાકંપનીઓ હોલ્ટેક એશિયા, ટાટા કન્સલ્ટિંગ એન્જિનિયર્સ લિમિટેડ અને લાર્સન એન્ડ ટુબ્રો લિમિટેડને પણ આ પરવાનગી આપવામાં આવી છે. હોલ્ટેક ઇન્ટરનેશનલ ભારતીય-અમેરિકન ક્રિસ પી સિંઘ દ્વારા પ્રમોટ કરવામાં આવે છે અને તેની સંપૂર્ણ માલિકીની પેટાકંપની હોલ્ટેક એશિયા 2010 થી પુણેમાં એક એન્જિનિયરિંગ યુનિટ ચલાવી રહી છે. તેનું ગુજરાતના દહેજમાં એક ઉત્પાદન યુનિટ છે.
