મહાકુંભ મેળામાં વાયરલ ગર્લ મોનાલિસાને ફિલ્મ ઓફર કરનાર દિગ્દર્શક સનોજ મિશ્રાની રેપ કેસમાં ધરપકડ કરવામાં આવી છે. દિલ્હી હાઈકોર્ટ દ્વારા તેમના જામીન નામંજૂર થયા બાદ, દિલ્હીના નબી કરીમ પોલીસ સ્ટેશન દ્વારા તેમની ધરપકડ કરવામાં આવી હતી. સનોજ મિશ્રા પર આરોપ છે કે તેણે ઝાંસીમાં રહેતી એક છોકરીને ફિલ્મમાં કામ આપવાની લાલચ આપીને તેનું શારીરિક શોષણ કર્યું હતું. એટલું જ નહીં, તેને ચૂપ રહેવા ધમકીઓ પણ આપી હતી.
આ મામલે પીડિતાએ ખુલાસો કર્યો છે કે, 18 જૂન 2021એ સનોજે તેને કૉલ કર્યો. તેણે કહ્યું કે, જો તું મને મળવા નહીં આવે તો હું આત્મહત્યા કરી લઈશ. આ ધમકીથી ગભરાઈને હું તેને એ જ દિવસે મળવા ગઈ. ત્યાંથી તે મને એક રિસોર્ટમાં લઇ ગયો અને મને માદક પદાર્થ પીવડાવીને મારી સાથે દુષ્કર્મ આચર્યું.’પીડિતાનો આક્ષેપ છે કે, ‘સનોજે મારા અશ્લીલ ફોટો અને વીડિયો બનાવ્યા હતા અને તેમને વાઈરલ કરવાની ધમકી આપતો હતો. ત્યાર પછી પણ તેણે લગ્નનાં ખોટા વચન આપીને મને વિવિધ સ્થળે બોલાવી અને મારી સાથે શારીરિક સંબંધ બનાવ્યા. તે મને ફિલ્મોમાં કામની લાલચ આપતો રહ્યો. હું એ જ આશામાં મુંબઈ જતી હતી અને સનોજ સાથે રહેવા લાગી. સનોજ ત્યાં પણ આ રીતે તેનું શોષણ કરતો રહ્યો.’
