નેશનલ હાઇવે ઑથોરિટી ઑફ ઇન્ડિયા દ્વારા નેશનલ હાઇવે અને સ્ટેટ હાઈવે પરના ટોલ ટેક્સમાં વધારો ઝીંકાયો છે. NHAI દ્વારા કારથી લઈને મોટા વાહનો સુધીના તમામ વાહનો માટે આજથી ટોલ પ્લાઝા પર 5થી 40 રૂપિયા સુધીનો વધારો કરવામાં આવ્યો છે. જેમાં અમદાવાદ-વડોદરા એક્સપ્રેસ વેની વાત કરવામાં આવે તો કાર અને જીપ જેવા લઘુવાહનો માટે હવે રૂપિયા 135ની જગ્યાએ 140 રૂપિયા ચૂકવવા પડશે.
જ્યારે બસ અને ટ્રક જેવા વાહનો માટે રૂપિયા 465ના બદલે 480 રૂપિયા ટોલ ચુકવવાનો રહેશે. તો વાસદથી વડોદરાના કાર-જીપના રૂપિયા 160 વસૂલાશે, તેમજ વડોદરાથી નડિયાદના રૂપિયા 70ના બદલે 75 વસૂલાશે.જ્યારે વડોદરાથી આણંદના કારના રૂપિયા 50ના બદલે રૂપિયા 55 આપવાના રહેશે. આમ, NHAI દ્વારા કારથી લઈને મોટા વાહનો સુધીના તમામ વાહનો માટે ટોલ પ્લાઝાના ટેક્સમાં વધારો કરવામાં આવતા વાહન ચાલકોને મોટો ઝટકો લાગ્યો છે.
