લખનૌ સુપર જાયન્ટ્સ અને ચેન્નાઈ સુપર કિંગ્સ વચ્ચે રમાયેલી મેચમાં ચેન્નાઈની ટીમે લખનૌને 5 વિકેટે હરાવ્યું હતું. લખનઉના ભારત રત્ન શ્રી અટલ બિહારી વાજપેયી એકાના સ્ટેડિયમ ખાતે રમાયેલી મેચમાં ચેન્નાઈ સુપર કિંગ્સે ટોસ જીતીને પહેલા બોલિંગ કરવાનો નિર્ણય લીધો હતો. લખનઉએ પ્રથમ બેટિંગ કરતા 20 ઓવરમાં 7 વિકેટ ગુમાવીને 166 રન બનાવ્યા હતા. લખનઉ તરફથી એકમાત્ર રિષભ પંતે અડધી સદી ફટકારી હતી, પંતે 63 રનની ઈનિંગ રમી હતી.
જ્યારે ચેન્નાઈ તરફથી જાડેજા અને પાથિરાનાએ 2-2 વિકેટ લીધી હતી. તો ખલીલ અહેમદ અને અંશુલ કંબોજે એક-એક વિકેટ લીધી હતી.167 રનના લક્ષ્યાંકનો પીછો કરવા ઉતરેલી ચેન્નાઈની ટીમે 19.3 ઓવરમાં 5 વિકેટે 168 રન બનાવી જીત મેળવી હતી. ચેન્નાઈ ટીમ માટે એમએસ ધોનીએ 26 રન, રચિન રવિન્દ્રએ 37 રન અને શિવમ દુબેએ 43 રન બનાવ્યા હતા. જ્યારે લખનઉ ટીમ તરફથી રવિ બિશ્નોઈને 2 વિકેટ મળી હતી. ચેન્નાઈની ટીમે આ સાથે આઈપીએલ 2025માં સતત પાંચ હાર બાદ પ્રથમ જીત નોંધાવી છે.
