આપણા વાળની સારી કેર માટે આપણે મોંઘા શેમ્પુ અથવા મોંઘી બ્રાન્ડ પ્રોડક્ટનો ઉપયોગ કરતા હોઈએ છીએ. પરંતુ છેલ્લા ઘણા સમયથી અસલીના નામે નકલીનો વેપાર થતો હોવાની ઘટનાઓ સામે આવી રહી છે. ત્યારે સુરત શહેરમાંથી અવારનવાર બ્રાન્ડેડ કંપનીની નકલી ચીજ વસ્તુઓનું વેચાણ થતું હોવાના કિસ્સા સામે આવે છે.
વધુ એક વખત સુરતમાંથી બ્રાન્ડેડ કંપનીના નામે નકલી શેમ્પૂનું વેચાણ થતુ હોવાનો પર્દાફાશ પોલીસે કર્યો છે. પોલીસે અમરોલી છાપરાભાઠા રોડ પર હિલ્ટન બિઝનેસ હબના બીજા માળે ઓફિસ ક્રમ ગોડાઉનમાં રેડ કરી હતી, જેમાં બ્રાન્ડેડ કંપનીના નકલી શેમ્પુ એક લિટરની બોટલો નંગ-1400 મળી હતી, જેની નંગની કિંમત 1100 રૂપિયા છે.
મળતી માહિતી મુજબ, સુરતમાંથી જાણીતી આંતરરાષ્ટ્રીય બ્રાન્ડ હેડ એન્ડ શોલ્ડલર્સનો 16 લાખથી વધુનો નકલી જથ્થો ઝડપી પાડ્યો છે. અમરોલી પોલીસે 16.36 લાખના મુદ્દામાલ સાથે એક ક્લાર્કને ઝડપી પાડ્યો છે. પોલીસે કંપનીના કર્મચારીની ફરિયાદ લઈ 3 સામે ગુનો દાખલ કર્યો છે, જેમાં ઓફિસમાં કામ કરતા હિતેશ ધીરૂ શેઠની ધરપકડ કરી છે. હિતેશ 12 હજારનો કર્મચારી છે, જ્યારે ઓફિસ ડેનીશ વિરામી અને જેમીલ ગાબાણીની છે. હાલમાં બંને ફરાર છે..પોલીસે ફરાર આરોપીઓને ઝડપવા કવાયત હાથ ધરી છે
