ગુજરાતના અમદાવાદમાં આગામી સમયમાં સેલિબ્રિટીઓ પણ ક્રિકેટ રમતા જોવા મળવાના છે. જી હાં ગુજરાતની કેટલીક જાણીતી સેલિબ્રિટી ક્રિકેટ રમશે. આ માટે સેલિબ્રિટી સુપર સિક્સિસનું આયોજન કરવામાં આવ્યું છે, જેના બ્રાન્ડ એમ્બેસેડર્સ તરીકે બોલીવુડના જાણીતા મ્યુઝિસિયન મીત બ્રધર્સ છે.
આ મેચ 6-6 ઓવરની રમાશે. જેમાં ગુજરાતી સિંગર ભાઈ-ભાઈ ફેમ અને બિગ બોસમાં જોવા મળેલા અરવિંદ વેગડા, ટી 20 ક્લબ ક્રિકેટમાં વર્લ્ડ રેકોર્ડ કરનાર અને વેલિયન્ટ ટીમના ભૂતપૂર્વ કેપ્ટન વિપુલ નારીગરા,ગોલ્ડ મેડાલિસ્ટ સ્પ્રિન્ટર સરિતા ગાયકવાડ, ગુજરાતી અભિનેત્રી દીપા ત્રિવેદી, ટીવી અભિનેતા તનમ્ય વકેરિયા (TMKOC), તેમજ અભિનેત્રી કરિશ્મા મોદી, જાણીતી અભિનેત્રી સપના વ્યાસ, અભિનેતા ચેતન દહીયા, અભિનેત્રી નિરાલી ઓઝા, અભિનેત્રી ગ્રેન્સી કનેરીયા, બોડીબિલ્ડર અમન રાઠોડ સહિત તારિકા ત્રિપાઠીઅને સૌનક વ્યાસ જેવા ફેમસ સેલિબ્રિટી ક્રિકેટ રમતા જોવા મળશે. સેલિબ્રિટી સુપર સિક્સિસની 6-6 ઓવરની આ મેચમાં એક ટીમમાં 8 સેલિબ્રિટી રમશે. આમ બંને ટીમમાં કુલ 16 સેલિબ્રિટી આ સુપર સિક્સિસમાં રમશે.
સેલિબ્રિટી સુપર સિક્સિસની મેચ પહેલા 2 કેમ્પ યોજાશે જેમાં ટીમો તમને પ્રેક્ટિસ કરતી જોવા મળશે. પહેલો કેમ્પ નવેમ્બર અને બીજો કેમ્પ ડિસેમ્બર મહિનામાં યોજાશે. સાથે આ મેચ ડિસેમ્બરમાં રમાશે.જ્યારે આ મેચમાં હોસ્ટ તરીકે RJ જયરાજ અને ચિંતન સુથાર જોવા મળશે.
