આજના યુગમાં શિક્ષણનું મહત્વ ખૂબ છે અને શિક્ષણ થી બુદ્ધિ અને જીવનનું ઘડતર થાય છે. ત્યારે મહેસાણા જિલ્લાના વિસનગરની એક યુવતીએ પણ શિક્ષણના આ મહત્વને સમજાવતું અદભૂત ઉદાહરણ સમાજને પુરુ પાડ્યું છે. જી હાં મહેસાણા જિલ્લાના વિસનગરની એમ.એન.કોલેજમાં એમ.એસ.સી કેમેસ્ટ્રીના સેમ-3માં અભ્યાસ કરતી અને પંચશીલ સોસાયટીમાં રહેતી પટેલ સૃષ્ટિ હર્ષદકુમારના શનિવારે લગ્ન હતા. જોકે, એકબાજુ તેના લગ્ન અને એ જ દિવસે તેને ઉત્તર ગુજરાત યુનિવર્સિટીની પરીક્ષા હતી. આવા સમયમાં પણ તેણે જીવનમાં ભણતરનું મહત્વ સમજીને લગ્ન મંડપથી સીધી પરિક્ષા આપવા કોલેજ પહોંચી હતી. આ માટે સૃષ્ટિના માતા-પિતા તેમજ સાસુ સસરા અને પતિએ ખૂબ સારો સહયોગ આપ્યો હતો.
