આજકાલ ફક્ત પુખ્ત વયના લોકો જ નહીં પરંતુ બાળકો પણ સ્માર્ટફોનના વ્યસની બની ગયા છે. સોશિયલ મીડિયા એ દરેક વ્યક્તિના જીવનનો એક સક્રિય ભાગ બની ગયો છે, જેને આપણે ઇચ્છીએ તો પણ અવગણી શક્તા નથી. લોકો પોતાનું કામકાજ છોડીને પણ કલાકો સોશિયલ મીડિયા પર વિતાવતા થઈ ગયા છે. તેવામાં આજના ડિજીટલ યુગમાં મોટી સંખ્યામાં નાના બાળકો મોબાઈલ ફોનનો ઉપયોગ કરે છે. મોબાઈલ અને ઈન્ટરનેટના કારણે તમામ લોકોનું જીવન સરળ બની ગયું છે, ત્યારે તે બાળકો માટે ખતરા સમાન પણ છે.ત્યારે ઓસ્ટ્રેલિયામાં 16 વર્ષથી ઓછી ઉંમરના બાળકોને સોશિયલ મીડિયા પ્લેટફોર્મ્સથી બચાવવા મહત્વનો નિર્ણય લેવામાં આવ્યો છે.
ઓસ્ટ્રેલિયાના હાઉસ ઓફ રિપ્રેઝન્ટેટિવ્સે બુધવારના રોજ બાળકોના સ્વાસ્થ્યને ધ્યાનમાં રાખીને 16 વર્ષથી ઓછી ઉંમરના બાળકોને સોશિયલ મીડિયા પ્લેટફોર્મ પર પ્રતિબંધિત કરવા માટે એક મહત્વપૂર્ણ બિલ પસાર કર્યું. હવે આ બિલને અંતિમ સ્વરૂપ આપવાનું કામ સેનેટ પર છોડી દેવામાં આવ્યું છે. પ્રમુખ પક્ષોએ આ બિલનું સમર્થન આપ્યું છે. આ બિલ હેઠળ ટિકટોક (Tiktok), ફેસબુક (Facebook), સ્નેપચેટ (Snapchat), રેડિટ (Reddit), એક્સ (X) અને ઈન્સ્ટાગ્રામ (Instagram) જેવા પ્લેટફોર્મ્સ પર બાળકોને એકાઉન્ટ બનાવવાથી રોકવા પર નિષ્ફળ રહેવા પર 50 મિલિનય ઓસ્ટ્રેલિયાઈ ડોલર (લગભગ 33 મિલિયન અમેરિકી ડોલર) સુધીનો દંડ ફટકારવામાં આવી શકે છે.
સરકારનું માનવું છે કે સોશિયલ મીડિયાના લીધે બાળકોના માનસિક અને શારીરિક સ્વાસ્થ્ય પર નકારાત્મક અસર પડે છે. બાળકો વાસ્તવિક જીવનમાં પાછા ફરે અને રમતગમત અને સામાજિક પ્રવૃત્તિઓમાં ભાગ લે.
