આનંદો ! વિસત સર્કલથી ઝુંડાલ સર્કલ સુધીનો રોડ બનશે આઈકોનિક રોડ, આકર્ષક ફૂટપાથ પણ હશે

BY CHINTAN SUTHAR
Ahmedabad – અમદાવાદ મ્યુનિસિપલ કોર્પોરેશન દ્વારા રૂપિયા 80 કરોડના ખર્ચે શહેરના વિસત સર્કલથી ઝુંડાલ સર્કલ સુધીના રોડને આઈકોનિક રોડ બનાવવાની તૈયારી કરવામાં આવી રહી છે. પશ્ચિમ ઝોનમાં આવેલ વિસત સર્કલથી ઝુંડાલ સર્કલ સુધીના 3.65 કિલોમીટર લાંબા રોડને આઈકોનિક રોડ તરીકે ડેવલપ કરવાની દરખાસ્ત સ્ટેન્ડિંગ કમિટીમાં મંજૂર કરવામાં આવી છે. વિસત સર્કલથી ઝુંડાલ સુધીના 3.65 લંબાઈ અને 60 મીટરની પહોળાઈ ધરાવતા આ રોડમાં વચ્ચેના ભાગમાં BRTS કોરિડોર હશે અને BRTS કોરિડોર સિવાયના રોડને આઈકોનિક રોડ તરીકે ડેવલપ કરાશે. આપને જણાવી દઈએ કે, આઈકોનિક રોડમાં 2.0 મીટરનો પાથવે, લેન્ડ સ્કેપીંગ અને બોલાર્ડ લાઈટીંગ, ઝોનમાં વેન્ડીંગ ઝોન, ગઝેબો, બેસવા માટે બેન્ચ, ઓનસ્ટ્રીટ પાર્કિંગ, વોકીંગ ટ્રેક, સ્કલ્પચર્સ, ચિલ્ડ્રન પ્લે એરિયા સહિતની સુવિધા ઉભી કરાશે.

રોડ ડેવલપમેન્ટમાં શું કરાશે?

આ પ્રોજેક્ટમાં BRTS કોરિડોર સિવાયનાં રોડને ડેવલપ કરાશે

BRTSની બન્ને બાજુનાં રોડને મિલીંગ કરી નવેસરથી રોડ બનાવાશે

મિક્સ ટ્રાફિક લેન અને સર્વિસ રોડ વચ્ચે ગ્રીન બફર ઝોન બનાવાશે, જેમાં લેન્ડ સ્કેપીંગ તથા બોલાર્ડ લાઇટીંગ લગાવાશે

સર્વિસ રોડની પહોળાઇ પાંચ મીટર રખાશે

સર્વિસ રોડને અડી બે મીટર સુધીની પહોળી ફૂટપાથ બનાવાશે

બફર ઝોનમાં વેન્ડીંગ ઝોન, ગઝેબો, ડિઝાઇનર બાંકડા, વોકીંગ ટ્રેક, સ્કલ્પ્ચર, ચિલ્ડ્રન પ્લે એરિયા વગેરે વિકસાવાશે

સ્થળ પરિસ્થિતિ મુજબ ઓનસ્ટ્રીટ પાર્કિંગની સુવિધા

જાહેરાત માટેનાં હોર્ડિંગ્સ થકી આવક ઊભી કરાશે

ટ્રાફિક સાઇનેજીસ, થર્મોપ્લાસ્ટિક રોડ માર્કિંગ પેઇન્ટ અને ટ્રાફિક એન્જિનિયરિંગ વગેરેની કામગીરી