ભારતીય બોક્સ ઓફિસનું કલેકશન ૨૦૨૪માં છલકાઈ ઉઠયુ હતુ. ભારતીય બોક્સ ઓફિસે ૨૦૨૪માં રુ. ૧૧,૮૩૩ કરોડની જંગી આવક કરી હતી. ગુજરાતી ફિલ્મ ઉદ્યોગ માટે ૨૦૨૪નું વર્ષ જબરદસ્ત નીવડયું છે. ગુજરાતી ફિલ્મ ઉદ્યોગના કલેકશનમાં ૬૬ ટકાનો નોંધપાત્ર ઉછાળો જોવા મળતાં તે રુ. ૮૦ કરોડ થયું છે. આ કલેકશન સફળ ગુજરાતી ફિલ્મ ઝમકુડીને આભારી છે. તેણે ૨૦ કરોડ રુપિયાથી પણ વધુ કલેકશન નોંધાવ્યું છે. આ ઉપરાંત ફૂટફોલ્સમાં પણ ૫૭ ટકા વધારો નોંધાયો છે. આમ ૨૦૨૪નું વર્ષ ગુજરાતી ફિલ્મ ઉદ્યોગ માટે જબરદસ્ત નીવડયું છે.
આ વર્ષે સૌથી વધુ કમાણી કરનાર 3 ગુજરાતી ફિલ્મોની વાત કરીએ તો તેમાં પ્રથમ નંબરે ‘જમકુડી’, બાદમાં ‘ફક્ત પુરુષો માટે’ અને ત્રીજા નંબરે ‘કસુંબો’ છે.હોરર કોમેડી ગુજરાતી ફિલ્મ ઝમકુડી દર્શકોને ખૂબ પસંદ આવી હતી. Sacnilk.com ના રિપોર્ટ મુજબ, જમકુડી આ વર્ષે સૌથી વધુ કમાણી કરનાર ગુજરાતી ફિલ્મ છે. ફિલ્મે 18.7 કરોડ રૂપિયાનું નેટ ગુજરાતી કલેક્શન કર્યું છે. જ્યારે વર્લ્ડ વાઈડ અને ઈન્ડિયા ગ્રોસમાં ફિલ્મની કમાણી 17.15 કરોડ રહી છે. ફિલ્મમાં ગુજરાતી ઈન્ફ્લુએન્સર વિરાજ ઘેલાણી, નેશનલ એવોર્ડ વિજેતા એક્ટ્રેસ માનસી પારેખ તથા સંજય ગોરડિયા, ઓરજ રાવલ જેવા કલાકારો છે. ફિલ્મને ઉંમગ વ્યાસ દ્વારા નિર્દેશિત કરવામાં આવી હતી.
પછીના ક્રમે કમાણી મામલે ‘ફક્ત પુરુષો માટે’ ફિલ્મ રહી છે. આ ફિલ્મ 8.69 કરોડ રૂપિયાની ઈન્ડિયા ગુજરાત નેટ ગ્રોસ કમાણી કરી છે. જ્યારે વર્લ્ડ વાઈડ અને ઈન્ડિયા ગ્રોસમાં ફિલ્મની કમાણી 8.4 કરોડ રહી છે. ફિલ્મમાં બોલિવૂડના મેગા સ્ટાર અમિતાભ બચ્ચને એક્ટિંગ કરી છે, સાથે જાણીતા એક્ટર દર્શન ઝરીવાલા, યશ સોની, ઈશા કંસારા તથા મિત્ર ગઢવી પણ છે.
આ ઉપરાંત કસુંબો આ વર્ષે સૌથી વધુ કમાણી કરનારી ત્રીજા નંબરની ફિલ્મ છે. કસુંબોએ ઈન્ડિયા ગુજરાતી નેટમાં કુલ 7.53 કરોડ રૂપિયાની કમાણી કરી છે. જ્યારે વર્લ્ડવાઈડ અને ઈન્ડિયા ગ્રોસમાં તેની કમાણી 9.55 કરોડ રૂપિયા રહી છે. ફિલ્મને રામમોરી, વિમલકુમાર ધામી અને વિજયગીરી બાવાએ લખી છે અને તેનું નિર્દેશન વિજયગીરી બાવાએ કર્યું છે. ફિલ્મની સ્ટાર કાસ્ટની વાત કરીએ તો ધર્મેન્દ્ર ગોહિલ, રૌનક કામદાર અને શ્રદ્ધા ડાંગર જેવા કલાકારોએ ફિલ્મમાં અભિનય કર્યો છે.
