દિવંગત રતન ટાટાના સૌથી યુવા સહયોગી શાંતનુ નાયડુને ટાટા મોટર્સમાં મોટી જવાબદારી મળી છે. શાંતનુને ટાટા મોટર્સમાં જનરલ મેનેજર અને સ્ટ્રેટેજિક ઇનિશિએટિવ્સનો પ્રમુખ બનાવવામાં આવ્યો છે. શાંતનુએ પોતે લિંક્ડઇન પર પોસ્ટ કરીને આ અંગે જાણકારી આપી છે અને ખુશી વ્યક્ત કરી છે. શાંતનુએ પોતાની પોસ્ટમાં લખ્યું કે, ‘મને આ વાત જણાવતા ખૂબ જ આનંદ થઇ રહ્યો છે કે ‘હું ટાટા મોટર્સમાં જનરલ મેનેજર અને સ્ટ્રેટેજિક ઇનિશિએટિવ્સ તરીકે મારી સફર શરૂ કરી રહ્યો છું.’
દિવગંત રતન ટાટાનો શ્વાન પ્રત્યેનો પ્રેમ કોઈનાથી છૂપાયેલો નથી. તેમની એક શ્વાનની મદદ કરતી વખતે જ શાંતનુ નાયડુ સાથે મુલાકાત થઈ હતી. શાંતનુ વર્ષ 2014માં રતન ટાટાને પહેલી વાર મળ્યો હતો. હકીકતમાં, તે સમયે નાયડુએ પાલતુ કૂતરાઓને રાત્રિના સમયે થતાં ટ્રાફિક અકસ્માતોથી બચાવવા માટે પ્રતિબિંબિત કોલર વિકસાવ્યા હતા. જે પછી પ્રાણીપ્રેમી રતન ટાટાના શાંતનુની કામગીરીથી પ્રભાવિત થયા હતા. ત્યારબાદ રતન ટાટાએ નાયડુને પોતાની ટીમમાં સામેલ કર્યો. છેલ્લા 10 વર્ષમાં શાંતનુ રતન ટાટાના નજીકનો અને વિશ્વાસુ મિત્ર બન્યો હતો.
શાંતનુ નાયડુએ વર્ષ 2022માં એક Goodfellows નામની કંપની શરૂ કરી હતી.આમાં રતન ટાટાએ રોકાણ કર્યું હતું. જોકે, ટાટાએ શાંતનુ નાયડુના વેન્ચર ગુડફેલોમાં પોતાનો હિસ્સો શાંતનુ નાયડુના નામે કર્યો છે. આ સ્ટાર્ટઅપ ભારતમાં એકલા રહેતા વૃદ્ધ લોકોની મદદ કરે છે. પ્રાણીપ્રેમ અને સમાજ સેવાનો જુસ્સો ધરાવતા શાંતનુએ ‘મોટોપોવ્સ’ નામની સંસ્થા બનાવી છે, જે શેરીઓમાં રખડતા કૂતરાઓને મદદ કરે છે. નાયડુના નેતૃત્વ હેઠળ, ‘મોટોપોવ્સ’ 17 શહેરોમાં વિસ્તર્યો અને 250 કર્મચારીઓને રોજગારી આપી છે. આ ઉપરાંત શાંતનુ નાયડુ વિવિધ સ્ટાર્ટઅપ્સમાં રોકાણ કરવા માટે રતન ટાટાને બિઝનેસ ટિપ્સ પણ આપતો હતો.
