IPL 2025ની 29મી મેચમાં મુંબઈ ઈન્ડિયન્સે દિલ્હી કેપિટલ્સને તેમના જ હોમ ગ્રાઉન્ડ અરુણ જેટલી સ્ટેડિયમ પર 12 રનથી હરાવીને એક રોમાંચક વિજય નોંધાવ્યો છે. આ જીત સાથે મુંબઈ ઈન્ડિયન્સ આ સિઝનમાં દિલ્હી કેપિટલ્સને હરાવનારી પ્રથમ ટીમ બની છે. દિલ્હી કેપિટલ્સે ટોસ જીતીને પહેલા બોલિંગ કરવાનો નિર્ણય લીધો હતો.
પહેલા બેટિંગ કરવા ઉતરેલી મુંબઇ ઇન્ડિયન્સે 20 ઓવરમાં પાંચ વિકેટ ગુમાવીને 206 રનનો ટાર્ગેટ આપ્યો હતો. ટાર્ગેટનો પીછો કરતા દિલ્હી કેપિટલ્સે 19 ઓવરમાં 193 રન બનાવીને ઓલઆઉટ થઇ ગઇ હતી. મુંબઇ તરફથી તિલક વર્માએ સૌથી વધુ 33 બોલમાં 59 રન બનાવ્યા હતા. જ્યારે સુર્યકુમાર યાદવે 28 બોલમાં 40 રન અને રિયાન રિકલ્ટને 41 રન બનાવ્યા હતા. 206 રનના ટાર્ગેટનો પીછો કરવા ઉતરેલી દિલ્હી કેપિટલ્સ તરફથી એકમાત્ર ઇમ્પેક્ટ પ્લેયર કરુણ નાયરે 40 બોલમાં 89 રન બનાવીને દિલ્હીની સ્થિતિ મજબૂત કરી હતી. જો કે, કરુણ સિવાય દિલ્હીના તમામ બેટર ફ્લોપ સાબિત થયા હતા. બોલિંગમાં મુંબઈ તરફથી કર્ણ શર્માએ 3 વિકેટ ઝડપી હતી અને મિચેલ સેન્ટનરે 2 વિકેટ ઝડપી હતી.
