૧૧ વર્ષની ઉંમરે, મોટાભાગના બાળકો શાળામાં, મિત્રો સાથે રમવામાં અથવા ઘરે મજા કરવામાં વ્યસ્ત હોય છે. પરંતુ ડાયના કિડિસિયુક આ ઉંમરે દુનિયાના સૌથી મોટી યુટ્યુબ ચેનલોમાંની એક ચલાવી રહી છે. યુટ્યુબની દુનિયામાં ઘણા એવા નામ છે, જેઓ પોતાના અનોખા કન્ટેન્ટના કારણે લાખો રૂપિયા કમાઈ રહ્યા છે. જેમાં એક નામ ડાયનાનું પણ છે.
આ નટખટ બાળકી રમકડા, બર્થ ડે પાર્ટી અને પોતાના નાના ભાઈ સાથે ઘણા મજેદાર સ્કિટ્સવાળા વીડિયો બનાવી કરોડો લોકોના દિલ જીતી રહી છે. તમે ‘Kids Diana Show’ નામ તો જરૂર સાંભળ્યું જ હશે, આ એક યૂટ્યુબ ચેનલ છે જ્યાં ડાયના અને તેનો ભાઈ રોમા અવનવા રમકડાથી રમે છે, જન્મદિવસ મનાવે છે અને કેટલીક ક્રિએટિવ એક્ટિવીટી કરે છે. જેના વીડિયો બનાવીને તેઓ યુટ્યુબ પર અવાર નવાર અપલોડ કરે છે, જેના માધ્યમથી તેઓ આજે ઘરે ઘરે જાણીતા બની ગયા છે.
તેમની યૂટ્યુબ ચેનલ છઠ્ઠા સ્થાને છે, જેના 135 મિલીયન (13.5 કરોડ) થી વધુ સબ્સ્ક્રાઈબર્સ છે. ડાયના અમેરિકાની સાથે સાથે ભારત, બ્રાઝિલ, સ્પેન, પોર્ટુગલ, મિડલ ઇસ્ટ સુધી પોપ્યુલર છે. તેઓ હવે વીડિયોની સાથે સાથે પ્રોડક્ટની બ્રાન્ડિંગ પણ કરે છે, જેના દ્વારા દર વર્ષે તેઓની આવક 80 કરોડથી વધુની થઈ ગઈ છે.
ડાયનાના માતા-પિતા છે પડદા પાછળના હિરો
ડાયનાના માતાપિતા પડદા પાછળ શોનું સંચાલન કરે છે, અને હવે તેને એક ગંભીર વ્યવસાયમાં ફેરવી દીધો છે – બ્રાન્ડ ડીલ્સ, મર્ચેન્ડાઇઝ અને લાઇસન્સિંગ. ડાયનાનો પહેલો વિડિઓ રેકોર્ડ કરવામાં આવ્યો ત્યારે તે માત્ર એક વર્ષની હતી.તેની માતા ઓલેનાએ તેને કિવમાં પાન ખાતા રેકોર્ડ કર્યો હતો. આ વીડિયો અત્યાર સુધીમાં લગભગ 2 મિલિયન વખત જોવામાં આવ્યો છે. શરૂઆતમાં, આ ચેનલ ફક્ત કૌટુંબિક વિડિઓઝ માટે હતી, પરંતુ પછીથી તેમાં રમકડાં અનબોક્સિંગ વિડિઓઝ ઉમેરવામાં આવ્યા, જે નાના બાળકોને ખૂબ ગમ્યા.ડાયનાના માતાપિતા, ઓલેના અને વોલોડીમીર, વ્યવસાયે કમ્પ્યુટર પ્રોગ્રામર અને માર્કેટિંગ નિષ્ણાતો છે. આનાથી તેઓ ચેનલને વ્યાવસાયિક રીતે સંભાળી શક્યા અને તેની પહોંચનો વિસ્તાર કરતા રહ્યા. જોકે પરિવાર ચેનલની કમાણી વિશે ખુલ્લેઆમ વાત કરતો નથી, માર્કેટ રિસર્ચ કંપની eMarketer અનુસાર, YouTube ના કાપ પછી પણ, ચેનલ વાર્ષિક લગભગ 85 કરોડ રૂપિયા કમાણી કરી રહી છે.
