IPL 2025ની 54મી મેચ પંજાબ કિંગ્સ અને લખનઉ સુપર જાયન્ટ્સ વચ્ચે ધર્મશાલાના એચસીપીએ સ્ટેડિયમમાં રમાઇ હતી. જેમાં પંજાબે લખનઉને 37 રને હરાવ્યું હતું. મેચમાં લખનઉએ ટોસ જીતીને પહેલા બોલિંગ કરવાનો નિર્ણય લીધો હતો. પંજાબ કિંગ્સે પહેલા બેટિંગ કરતા 20 ઓવરમાં પાંચ વિકેટ ગુમાવીને 237 રનનો ટાર્ગેટ આપ્યો હતો. પંજાબ તરફથી ઓપનર બેટર પ્રભસિમરન સિંહે શાનદાર બેટિંગ કરી હતી. પ્રભસિમરને 48 બોલમાં 91 રન બનાવ્યા હતા. તે માત્ર 9 રનથી સદી ચૂક્યો હતો. પ્રભસિમરન સિવાય કેપ્ટન શ્રેયસ ઐયરે 25 બોલમાં 45 રન બનાવ્યા હતા.
આ સિવાય શશાંક સિંહ અને જોશ ઇંગ્લિશની મદદરૂપ ઇનિંગથી પંજાબે લખનઉને 237 રનનો ટાર્ગેટ આપ્યો હતો. જેની સામે લખનઉની ટીમ 20 ઓવરમાં 7 વિકેટ ગુમાવીને 199 રન જ બનાવી શકી હતી. આયુષ બદોની જ આ મેચમાં લખનઉ તરફથી સારી બેટિંગ કરી શક્યો હતો. આયુષ બદોનીએ મેચમાં 40 બોલમાં 74 રન બનાવ્યા હતા. આ સિવાય સાતમા ક્રમે આવેલા અબ્દુલ સમદે 24 બોલમાં 45 રન બનાવ્યા હતા.
બોલિંગની વાત કરવામાં આવે તો પંજાબ તરફથી અર્શદીપ સિંહે 4 ઓવરમાં 16 રન આપીને 3 વિકેટ ઝડપી હતી. અઝમતુલ્લાહ ઓમરઝઇએ 3 ઓવરમાં 21 રન આપીને 2 વિકેટ ઝડપી હતી. આ સિવાય માર્કો જાન્સન અને યુઝવેન્દ્ર ચહલે 1-1 વિકેટ ઝડપી હતી. આ મેચમાં જીત સાથે પંજાબ કિંગ્સની ટીમ 15 પોઇન્ટ સાથે બીજા ક્રમે આવી ગઇ છે. પંજાબ કિંગ્સે આ સિઝનમાં 11 મેચમાંથી 7 મેચ જીતી છે, જ્યારે 3 મેચમાં હાર અને એક મેચ રદ થઇ હતી
