માઈક્રોસોફ્ટ પછી હવે અમેઝોને પણ તેના કર્મચારીઓની સંખ્યામાં ઘટાડો કર્યો છે. ઈ-કોમર્સ સાથે જોડાયેલી મહાકાય કંપની અમેઝોને તેના ડિવાઇસ અને સર્વિસ યુનિટમાંથી લગભગ 100 કર્મચારીઓને છૂટા કર્યા છે. આ પાછળ કંપનીનો તર્ક એ છે કે કંપનીની કાર્યક્ષમતા વધારવા અને ઉત્પાદન રોડ મેપ સાથે સુસંગત થવા માટે આ પગલું જરૂરી હતું.
અમેઝોન દ્વારા કરવામાં આવેલી આ છટણી અંગે કંપનીના પ્રવક્તા ક્રિસ્ટી શ્મિટ કહે છે કે અમે આ નિર્ણયોને હળવાશથી લેતા નથી અને અમે પ્રભાવિત કર્મચારીઓને ટેકો આપવા માટે પ્રતિબદ્ધ છીએ. જે કર્મચારીઓને છૂટા કરવામાં આવ્યા હતા તેઓ કિન્ડલ ઈ-રીડર્સ, રીંગ વિડીયો ડોરબેલ્સ અને એલેક્સા વોઈસ આસિસ્ટન્ટ જેવા ઉત્પાદનો પર કામ કરતા હતા. જેના પરથી સ્પષ્ટ થાય છે કે અમેઝોન તેના કર્મચારીઓની સંખ્યા ઘટાડવામાં વ્યસ્ત છે. જોકે, અમેઝોને એ જણાવ્યું નથી કે છટણી કયા ચોક્કસ પ્રદેશોને અસર કરશે.
